शेवग्याच्या कोवळ्या पानांची भाजी
(शेवग्याचं झाड घरी असेल तरच कोवळा पाला मिळतो . बाजारात शेवग्याची पानं भाजी म्हणून विकत मिळत नाहीत .)
साहित्य :-
१) शेवग्याचा कोवळा पाला (साधारण एक जुडी होईल एवढा)
२) लसणाच्या पाकळ्या चार-पाच
३) जिरं अर्धा चमचा
४) हिरव्या मिरच्या तीन-चार
५) मुगाची डाळ अर्धी वाटी
६) तेल , फोडणीचं साहित्य
७) चवीपुरतं मीठ .
कृती :-
१) मुग डाळ एक तास आधी धुवून भिजत ठेवावी व नंतर निथळून घ्यावी .
२) शेवग्याची पानं धुवून चिरून घ्यावी . लसूण हिरव्या मिरच्या , जिरं वाटून घ्यावं . फोडणी करून त्यात वरील वाटण घालावं .
३) ते खमंग परतल्यावर त्यात डाळ घालावी व डाळ जराशी परतल्यावर त्यात चिरलेली भाजी घालावी . मीठ घालून झाकण ठेवून मोकळी शिजू दयावी .
४) शेवग्याचा पाला काहीसा तुरट-कडवट चवीचा असतो . पण भाजी केल्यावर चांगली लागते . याच्या फुलांची दही घालून कोशिंबीर करतात .
